Нәрсә соң ул бәхет? Ә укытучы бәхете нинди була  ул? Әлеге сорауларга бертөрле генә җавап бирү мөмкин түгелдер, минемчә. Чөнки җир йөзендә яшәүче кешеләр саны күпме булса, әле сорауга җаваплар да шуның  кадәрдер, мөгаен. Ни өчен дисезме? Чөнки бәхет төшенчәсен һәркем үзенчә аңлый. Берәүләр өчен ул саулык-сәламәтлек, икенчеләр өчен әти-әниле булу, өченчеләр исә  ул - кыйммәтле  машина. Ә менә укытучы бәхете алда саналганнардан аерылып тора. Беренчедән, укытучы өчен яраткан эшең булу - бик мөһим. Икенчедән, сине хөрмәт итеп торучы укучыларың һәм әти-әниләрнең карашын тою - бәхет. Өченчедән, эшеңнең нәтиҗәсен күрү  безгә шатлык китерә. Ләкин боларга ирешү өчен һәрбер укытучының ныклы тылы, терәге булу да бик мөһим. Шушы сорауларга җавап табу максатыннан, мин "Бәхет" сайты булдырдым. Әлеге сайт - безнең гаиләбез сайты. Анда гаилә тарихыннан истәлекле вакыйгаларны үз эченә алган бәхетле мизгелләр урын алган. Кызыксынучылар өчен мин сайтның адресын да тәкъдим итәм: https://baxet.jimdo.com Әгәр дә гаиләбез белән тулырак танышырга теләк белдерәсез икән, сайтыбызга рәхим итегез. Мин кунакларга һәрчак шат.